(+994 50) 700 04 06

BLOQ

26.08.2022
183

Fiziki şəxsin xəbərsiz itkin düşmüş və ya ölmüş elan edilməsi

Azərbaycan Respublikasının qanunvericiliyinə görə, son iki il ərzində fiziki şəxs yaşayış yerində görünməyibsə və hazırda olduğu yer məlum deyilsə maraqlı şəxslərin ərizəsi əsasında məhkəmə onu xəbərsiz itkin düşmüş hesab edə bilər. Həmin müddət fiziki şəxs barəsində son məlumatların alındığı gündən hesablanır. Həmin günü müəyyənləşdirmək mümkün olmadıqda, xəbərsiz itkin düşmüş sayılma müddətinin hesablanması itkin düşmüş barəsində son məlumatların alındığı aydan sonrakı ayın birinci günündən, bunu da müəyyənləşdirmək mümkün olmadıqda  sonrakı ilin yanvar ayının 1 – dən hesablanır. Şəxsin xəbərsiz itkin düşməsi haqqında məhkəmə qərarı qüvvəyə mindikdən sonra həmin şəxsin qanuni vərəsələri onun əmlakını etibar olunmuş əmlak kimi idarə etmək və ondan fayda götürmək hüququ əldə edirlər. Bu əmlakdan xəbərsiz itkin düşmüş şəxsin öhdəsində olanlara dolanışıq xərcləri verilir və borclar ödənilir.  Əgər şəxsin yaşayış yerində onun harada olması barədə beş il ərzində heç bir məlumat yoxdursa, habelə o, ölüm təhlükəsi törədən və ya hansısa bədbəxt hadisədən həlak olduğunu güman etməyə əsas verən şəraitdə xəbərsiz itkin düşüb və ondan altı ay ərzində xəbər çıxmazsa, o, məhkəmə qaydasında ölmüş elan edilə bilər. Əgər hərbi qulluqçu və ya digər şəxs hərbi əməliyyatlar zamanı xəbərsiz itkin düşərsə həmin şəxs hərbi əməliyyatların bitməsindən azı iki il keçdikdən sonra məhkəmə qaydasında ölmüş elan edilə bilər. Şəxsin ölmüş elan edilməsi barədə məhkəmə qərarı qüvvəyə mindiyi gün onun ölüm günü hesab edilir və fiziki şəxsin ölümü ilə əlaqədar yaranan hüquqi nəticələr adi qaydada tətbiq edilir. Ölmüş elan edilmiş şəxs qayıtdıqda və ya onun olduğu yer aşkar edildikdə şəxsin ölmüş elan edilməsi ilə bağlı məhkəmə qərarı ləğv edilir. Nə vaxt qayıtmasından asılı olmayaraq, şəxs onun ölmüş elan edilməsindən sonra əvəzsiz olaraq başqasına verilmiş əmlakının qalan hissəsinin qaytarılmasını tələb edə bilər.  
04.08.2022
146

Əcnəbilərin və vətəndaşlığı olmayan şəxslərin Azərbaycan Respublikası ərazisində müvəqqəti olma müddəti

İsti yay günləri və müvafiq olaraq çimərlik mövsümünün başlaması ilə əcnəbilərin Azərbaycana səfərlərində artım müşahidə edilir. Bəs əcnəbilər və vətəndaşlığı olmayan şəxslərin Azərbaycan Respublikası ərazisində müvəqqəti qalma müddəti qanunvericiliklə nə qədər müəyyənləşdirilib? Azərbaycan Respublikasına gələn əcnəbilərin və vətəndaşlığı olmayan şəxslərin ölkədə müvəqqəti olma müddəti aşağıdakı kimidir: əgər əcnəbi və ya vətəndaşlığı olmayan şəxs viza ilə Azərbaycan Respublikasına səfər etmişsə bu zaman Azərbaycan Respublikasında müvəqqəti olma müddəti vizada göstərilən qalma müddəti ilə məhdudlaşır; viza tələb olunmayan qaydada Azərbaycan Respublikasına gələn əcnəbilərin və vətəndaşlığı olmayan şəxslərin isə ölkədə müvəqqəti olma müddəti, Azərbaycan Respublikasının tərəfdar çıxdığı beynəlxalq müqavilələrdə nəzərdə tutulmuş hallar istisna olmaqla, 90 gündən artıq ola bilməz. Bu müddət bitənədək əcnəbilər və vətəndaşlığı olmayan şəxslər ölkədə müvəqqəti olma müddətini uzatmadıqda və müvəqqəti yaşamaq üçün icazə almadıqda, habelə  müvəqqəti olma müddətinin uzadılması və ya müvəqqəti yaşama icazəsinin alınması üçün müraciət etmədikdə, Azərbaycan Respublikasının ərazisini tərk etməlidir. Azərbaycan Respublikasında 15 gündən artıq müvəqqəti olan əcnəbilər və ya vətəndaşlığı olmayan şəxslər olduğu yer üzrə qeydiyyata alınmalıdır. Bu barədə məlumat ölkəyə daxil olan əcnəbilərə və vətəndaşlığı olmayan şəxslərə sərhəd buraxılış məntəqələrində verilir. Bunun üçün əcnəbinin və ya vətəndaşlığı olmayan şəxsin qaldığı yerin (mehmanxana, sanatoriya, istirahət evi, pansionat, kempinq, turist bazası, xəstəxana və ya digər belə ictimai yerlər) müdiriyyəti və ya mənzilin, digər yaşayış sahəsinin sahibi və ya əcnəbi və ya vətəndaşlığı olmayan şəxs özü, Miqrasiya Məcəlləsində nəzərdə tutulan sənədləri müvafiq icra hakimiyyəti orqanının internet informasiya ehtiyatı, elektron poçt vasitəsi ilə və ya şəxsən müvafiq icra hakimiyyəti orqanına təqdim etməlidir. Əcnəbilər və vətəndaşlığı olmayan şəxslər, viza ilə gəldikdə vizada göstərilən müddətə, vizasız gəldikdə isə 90 gün müddətinə müvəqqəti qeydiyyata alınır. Qeyd edək ki, əcnəbilərin və vətəndaşlığı olmayan şəxslərin olduğu yer üzrə qeydiyyata alınması üçün dövlət rüsumu ödənilmir. Əcnəbi və ya vətəndaşlığı olmayan şəxs olduğu yeri dəyişdikdə, 5 iş günü ərzində yeni olduğu yer üzrə qeydiyyata alınmalıdır. Əcnəbi və ya vətəndaşlığı olmayan şəxs qeydiyyata alındığı mənzilin (yaşayış sahəsinin) sahibinə məxsus digər mənzildə (yaşayış sahəsində) müvəqqəti qaldıqda, onun olduğu yer üzrə yenidən qeydiyyata alınması tələb olunmur. Yuxarıda qeyd edilən qaydaların əcnəbi və ya vətəndaşlığı olmayan şəxslər tərəfindən pozulması İnzibati Xətalar Məcəlləsi ilə məsuliyyət yaradır. Belə ki, bu qaydalara əməl etməyən şəxslər ölkədən çıxarılmaqla və ya çıxarılmamaqla cərimə edilir. Əcnəbilər və vətəndaşlığı olmayan şəxslər olduğu yeri tərk etdikdə, onu qəbul edən tərəf və ya şəxs özü bu barədə müvafiq icra hakimiyyəti orqanına məlumat verir və bu məlumat əsasında onlar olduğu yer üzrə qeydiyyatdan çıxarılırlar. Qeydiyyat müddəti başa çatdıqda isə əcnəbilər və vətəndaşlığı olmayan şəxslər avtomatik olaraq qeydiyyatdan çıxarılmış hesab edilir.
25.07.2022
149

Özbaşına (qanunsuz) tikili nədir və nə zaman sökülməlidir?

Vətəndaşlar bir çox hallarda öz tikililəri ilə bağlı bəzi problemlərlə qarşılaşır. Dövlət orqanları tərəfindən tikililərinin qanunsuz olduğu və söküləcəyi barədə xəbərdar edilirlər. Bəs Azərbaycan Respublikası qanunvericiliyinə görə hansı tikililər qanunsuz sayılır və sökülməlidir? Azərbaycan Respublikasının Mülki Məcəlləsinə görə, tikinti məqsədləri üçün ayrılmayan torpaq sahəsində və ya buna lazımi icazələr almadan və ya şəhərsalma və tikinti normalarını və qaydalarını ciddi surətdə pozmaqla tikilmiş yaşayış evi, digər tikili, qurğu və ya başqa daşınmaz əmlak özbaşına tikinti sayılır. Özbaşına tikinti aparmış şəxs ona mülkiyyət hüququ əldə edə bilməz. Onun tikintiyə dair sərəncam vermək - onu satmaq, bağışlamaq, icarəyə vermək, digər əqdlər bağlamaq ixtiyarı yoxdur. Özbaşına tikintiyə mülkiyyət hüququ məhkəmə tərəfindən o şəxs üçün tanına bilər ki, tikinti aparılmış torpaq sahəsi onun mülkiyyətində olsun. Əgər tikintinin saxlanılması digər şəxslərin hüquqlarını və qanunla qorunan mənafelərini pozursa və ya fiziki şəxslərin həyatı və sağlamlığı üçün təhlükə yaradırsa, göstərilən şəxsin özbaşına tikintiyə mülkiyyət hüququ tanına bilməz. Barəsində icazə tələb olunan tikinti şəhərsalma və tikintiyə dair normativ sənədlərin tələblərinə zidd olmadığı təqdirdə, müvafiq icra hakimiyyəti orqanı tikintiyə icazə verməlidir. Sifarişçi tikintiyə icazə almaq üçün müvafiq icra hakimiyyəti orqanına (quruma) ərizə ilə müraciət edir. Ərizəyə aşağıdakı sənədlər əlavə edilməlidir: torpaq sahəsi üzərində tikinti aparılmasına səlahiyyət verən mülkiyyət, icarə və ya istifadə hüququnu təsdiq edən sənədin surəti; tikinti layihəsi; sifarişçi hüquqi şəxs olduqda, hüquqi şəxslərin dövlət reyestrindən çıxarışının surəti, fiziki şəxs olduqda, şəxsiyyətini təsdiq edən sənədin surəti; “Ətraf mühitə təsirin qiymətləndirilməsi haqqında” Azərbaycan Respublikası Qanununun əlavəsində göstərilən fəaliyyət növləri üzrə layihələrin ətraf mühitə təsirinin qiymətləndirilməsi (ƏMTQ) sənədi və həmin sənədin dövlət ekoloji ekspertizasının rəyi. Tikintisi başa çatmış və ya çatmamış tikinti obyekti və ya onun hissəsi qanunda nəzərdə tutulmuş bəzi hallarda sökülə bilər: Şəhərsalma və Tikinti Məcəlləsinə görə, tikintisinə bu Məcəllə qüvvəyə mindikdən sonra başlanılmış və tikinti mərhələsində olan tikinti obyekti və ya onun hissəsi müvafiq icra hakimiyyəti orqanı və ya bələdiyyə tərəfindən tikinti məqsədləri üçün ayrılmamış dövlət və ya bələdiyyə mülkiyyətində olan torpaq sahəsində inşa edildikdə; tikintiyə icazənin tələb olunmasına baxmayaraq, tikinti obyekti belə icazə alınmadan tikildikdə və buna əsasən tikinti işlərinin dayandırılması barədə qərar qəbul edildiyi gündən 1 il ərzində tikintiyə icazə alınmadıqda. Bu hallarda tikinti obyeklərinin sökülməsi barədə qərar qəbul edilir. Bu qərar məhkəmədə maraqlı şəxslər tərfindən mübahisələndirilə bilər.
07.07.2022
188

Hüquqi şəxs təsisetmə

Digər bir çox terminlər kimi hüquqi şəxs anlayışının da təməlləri Roma Hüququna dayanmaqdadır. Ancaq Roma Hüququnda hüquqi şəxs anlayışı bir qədər fərqli inkişaf xəttinə malik olub. Belə ki, Romalılara görə, “bütün hüquq insanlar üçündür” nəzəriyyəsi əsas olub. Bu nəzəriyyəni ilk oxuduqda insandan başqa heç bir varlığa hüquq qabiliyyəti verilə bilməz yönündə bir nəticəyə gəlmək mümkündür. Ancaq bir tək insan gücünün və ömrünün kifayət etməyəcəyi, yenə insanlarla bağlı bəzi məqsədlərə çatılabilməsi üçün insanlardan ibarət qrupların əməyinə ehtiyac duyulması hüquqi şəxsin meydana gəlmə səbəblərindən biridir. Bəzən bir mal və xidmətlər toplusunun müəyyən bir məqsədə xidmət edəcək şəkildə təsis edilməsi və bunların onu müəyyən məqsədlər üçün təhsis edən şəxslərin fərdi fəaliyyətlərindən daha geniş olaraq daha uzun müddət mövcud olma ehtiyacı, Roma hüququnda da qruplara bir “Şəxs” statusu verilməsini məcburi hala gətirmişdir.  Digər bir çox terminlər kimi hüquqi şəxs anlayışının da təməlləri Roma Hüququna dayanmaqdadır. Ancaq Roma Hüququnda hüquqi şəxs anlayışı bir qədər fərqli inkişaf xəttinə malik olmuşdur`. Belə ki, Romalılara görə, “bütün hüquq insanlar üçündür” nəzəriyyəsi əsas olmuşdur. Bu nəzəriyyəni ilk oxuduqda insandan başqa heç bir varlığa hüquq qabiliyyəti verilə bilməz yönündə bir nəticəyə gəlmək mümkündür.  Roman – German hüquq sisteminə daxil olan Azərbaycan qanunvericiliyinə görə, hüquqi şəxs qanunla müəyyənləşdirilən qaydada dövlət qeydiyyatından keçmiş, xüsusi yaradılmış elə bir qurumdur ki, mülkiyyətində ayrıca əmlakı vardır, öz öhdəlikləri üçün bu əmlakla cavabdehdir, öz adından əmlak və şəxsi qeyri-əmlak hüquqları əldə etmək və həyata keçirmək, vəzifələr daşımaq, məhkəmədə iddiaçı və ya cavabdeh olmaq hüququna malikdir.  Hüquqi şəxslər bir fiziki və ya hüquqi şəxs tərəfindən, yaxud fiziki və hüquqi şəxslərin toplusu tərəfindən yaradıla bilər, üzvlüyə əsaslana bilər, üzvlərin olmasından asılı ola və ya asılı olmaya bilər, sahibkarlıq fəaliyyəti ilə məşğul ola və ya məşğul olmaya bilər.  Hüquqi şəxslər fəaliyyətinin əsas məqsədi mənfəət götürməkdən ibarət olan kommersiya hüquqi şəxsləri və ya əsas məqsədi mənfəət götürməkdən ibarət olmayan və götürülən mənfəəti iştirakçıları arasında bölüşdürməyən qeyri-kommersiya hüquqi şəxsləri, habelə ümumdövlət və (və ya) ictimai əhəmiyyət daşıyan fəaliyyətlə məşğul olan publik hüquqi şəxslər formasında yaradıla bilər. Hüquqi şəxs onun təsis edilməsi və nizamnaməsinin hazırlanması yolu ilə yaradılır. Əgər hüquqi şəxs bir neçə təsisçi tərəfindən yaradılırsa, təsisçilər müqavilə bağlayaraq hüquqi şəxsin nizamnaməsini, onun yaradılması üzrə birgə fəaliyyət qaydasını, özlərinin əmlakının ona verilməsi və onun fəaliyyətində iştirak edilməsi şərtlərini müəyyənləşdirirlər. Hüquqi şəxsin təsisçiləri tərəfindən təsdiq edilmiş nizamnaməsi hüquqi şəxsin təsis sənədidir. Hüquqi şəxsin nizamnaməsində hüquqi şəxsin adı, olduğu yer, fəaliyyətinin idarə edilməsi qaydası, habelə onun ləğvi qaydası müəyyənləşdirilir. Qeyri-kommersiya hüquqi şəxsinin nizamnaməsində onun fəaliyyətinin predmeti və məqsədləri müəyyənləşdirilir.  Hüquqi şəxs qanunla nəzərdə tutulmuş qaydada dövlət qeydiyyatına alınmalıdır. Dövlət qeydiyyatının məlumatları, o cümlədən kommersiya təşkilatları üçün firma adı ümumi tanışlıq üçün açıq olan hüquqi şəxslərin dövlət reyestrinə daxil edilir.  Hüquqi şəxsin hüquq qabiliyyəti dövlət qeydiyyatına alındığı andan yaranır. Kommersiya hüquqi şəxsləri qanunla qadağan edilməyən istənilən fəaliyyət növlərini həyata keçirmək üçün zəruri mülki hüquqlara malik ola və mülki vəzifələr daşıya bilərlər. Siyahısı qanunvericiliklə müəyyənləşdirilən ayrı-ayrı fəaliyyət növləri ilə hüquqi şəxslər yalnız xüsusi icazə (lisenziya) əsasında məşğul ola bilərlər.  Biz sizə kommersiya və qeyri kommersiya hüquqi şəxslərinin yaradılmaında peşəkar xidmətlərimizi təklif edirik: Hüquqi şəxsin təsis sənədlərinin və Nizamnaməsinin hazırlanması; Hüquqi Şəxsin dövlət qeydiyyatına alınması; Hüquqi şəxsin dövlət reyestrinə daxil edilməsi; Ayrı-ayrı fəaliyyət növləri üçün xüsusi icazə - lisenziyaların alınması və digər bütün lazımi prosedurları sizin adınıza həyata keçiririk. 
18.01.2021
2396

Rahat pul qazanmaq haqqında miflər

Uğurlu və zəngin insan olmağın ən vacib meyarlarından biri, pulun düzgün xərclənməsidir. Bəzən insanın istedadı,  təşkilatçılıq qabiliyyəti və münasibət qurma bacarığı olduğu halda  uğur qazana bilmir. Bəlkə də səbəb məhz pul qazanmağa olan yanlış münasibətdir.  Pulla bağlı ən çox yayılmış miflərdən bir neçəsi ilə tanış olun! 1.    "Düzgün fəaliyyət sahəsi seçmədim və buna görə də zəngin deyiləm." Demək olar ki, hər sahədə milyoner və milyarderlər var. Yalnız bir sferada zəngin insan çox  olduğu üçün, həmin  peşənin seçimi kökündən səhv  yanaşmadır. Ruhunuzu rahatladan bir işlə məşğul olun! İstənilən sahədə layiqli kapital qazanmaq mümkündür. 2.    "Varlı bir ailədən olsaydım, pul qazanmağım daha asan olardı." Dünyanın ən varlı adamlarının reytinqində ilk sırada yer alan bir çox iş adamları heç də varlı ailədə doğulmayıblar.  Onların hamısı uzun bi yol keçərək, zəhmətləri sayəsində qazanc əldə ediblər. Hər kəsin zənginləşmə şansı var və valideynlərinizin kim olduğu vacib deyil. 3.    "Məktəbdə, kollecdə yaxud  universitetdə daha yaxşı oxumuş olsaydım, zəngin ola bilərdim."  Şübhəsiz ki, bilik vacibdir. Lakin bəzən praktik bacarıq nəzəri biliklərdən daha çox şey örədə bilər insana. Məktəbdə əla tələbə olmaq maddi uğurun təminatı deyil. Bu əksinə də işləyə bilər. 4.    "Zəngin insanlar təsadüfən lazımlı anda lazımlı yerdə olurlar."  Bu qətiyyən belə deyil. Onların uğuru bilavasitə şansla bağlı deyil. Uğurlu insanların əksəriyyəti yalnız bir sıra uğursuzluqlardan keçdikdən sonra müvəffəqiyyət qazanıblar. 5.    "İqtisadi cəhətdən daha uğurlu bir ölkədə yaşasaydım, sərvət əldə etmək daha asan olardı." Hər ölkədə və hər cəmiyyətdə varlı insanlar var. 6.    "İndi böyük pul qazanmaq üçün fürsətlər azdır."  Belə bir fikri ancaq düşüncələri keçmiş zamanda qalan insanlar söyləyə bilər. Texnologiyanın sürətli inkişafı sayəsində, indi pul qazanmaq əvvəlki dövrlərə nisbətdə daha asanlaşıb. 7.    "Başlanğıc üçün kapitalım yoxdur, ona görə də öz biznesimi qura bilmirəm." Nəhəng okean kiçik su damlalarından ibarətdir. Bir damla ilə başlayaraq, okeana bir addım daha yaxınlaşmış oluruq. Həm də bütün ideyaları reallaşdırmaq üçün böyük investisiyalar tələb olunmur. 8.    "Çox çalışacam və mütləq milyoner olacam."     Dünyada çox çalışıb varlanmayan insanlar üstünlük təşkil edir. Çox çalışmayın, ağıllı çalışın!
13.01.2021
1331

Biznesə başlamaq üçün 10 tövsiyə

 Sizə biznesdə necə uğur qazanacağınızı heç kim söyləməyəcək, amma düşünmək üçün  hər zaman sağlam tövsiyə verilə bilər. Biznesə yeni başlayanlar üçün bu 10 tövsiyə təşəbbüskarın düşünməsi üçün lazım olan bütün aspektləri əks etdirir.  Yeni biznesə başlayırsınız, yoxsa bu biznes bazarda çoxdan var? Hər bir halda mütəxəssislərin rəyini öyrənmək faydalıdır. 1.    Konsentrasiya, konsentrasiya, bir də konsentrasiya! Təzə başlayan sahibkar hər fürsətdən istifadə edilməli olduğunu düşünür, amma bu yalnış  fikirdi. Bir neçə layihədə özünü sübut etmək cəhdi, imkanlaın  bölünməsinə, bu da işin effektivliyinə və məhsuldarlığına təsir edəcəkdir. Atalar demiş, bir əldə iki qarpız tutmaq olmaz. 2.    Sevdiyin işlə məşğul ol! Biznesinizə sadəcə böyük gəlirlər gətirə biləcəyi ehtimalı ilə başlamayın. Gücünüz və istedadınız üzərində qurulan  işin daha çox uğur qazanma şansı var. Hər gün böyüməsinə və çiçəklənməsinə töhfə vermək üçün yalnız gəlirə fokuslanmaq deyil, həm də bundan zövq almaq vacibdir. Əks halda layihəniz uğursuzluğa məhkumdur. 3.     İstəyini 30 saniyədə de, ya da  heçnə demə! İstər potensial investorla görüşdə, istərsə də maraqlı bir müştəri ilə söhbət zamanı fikrinizi  düzgün çatdırın. İlk növbədə məqsədinizi bildirin, missiyanızı və xidmətlərinizi mümkün qədər qısa və aydın şəkildə izah edin. Unutmayın ki, atdığınız  hər düzgün addımı və fikrinizin lokanikliyini  qarşı tərəf yüksək qiymətləndirəcək. 4.    Bildiklərinə əmin ol, bilmədiklərini öyrən, bilmədiklərini öyrədə biləcək birini tanı! Dünyada heç kim hər şeyi bilmir, bu sənə də aiddir. Buna görə, inandığın insanların və ya mentorların tövsiyələrinə qulaq as. Onların əhatəsində  düzgün prioritetlərlə əsl lider və bacarıqlı  iş adamı ola bilərsən. Odur ki, ortaq maraqlarını bölüşdüyün uğurlu və təcrübəli insanları əhatənə topla. Onlarla qarşılıqlı, faydalı və uzunmüddətli əlaqələr qur. 5.    Cüzdanınız - işinizin ürəyidir! Öz biznesinə uyğun ol! Komfortlu ofisləri, sürətli avtomobilləri və bahalı restoranları unut. İşinə fokuslan və biznesini daim inkişaf etdir. Xərclərini izlə  və nə isə almadan əvvəl üç dəfə düşün. Məhdud maliyyə ilə effektiv pul vəsaitlərinin idarə edilməsi uğurlu bir başlanğıcın açarıdır. 6.    "Atəş altında" yaşamağı öyrən! Heç bir təhsil və ya iş planı gələcəyinizi mükəmməl şəkildə təxmin edə və ya sizi uğurlu bir biznesmen edə bilməz. Mükəmməl bir plan mövcud deyil və ola da bilməz.  Növbəti addımlarınızı düşünmədən heç vaxt yeni bir işə başlamağa çalışmayın,həmçinin  hərəkətə keçməyə  aylar və ya illər sərf etməyin. Unutmyın ki, real çətinliklərlə qarşılaşmaq Sizi təcrübəli bir iş adamına çevirəcək. Edə biləcəyiniz ən vacib şey səhvlərinizdən nəticə çıxartmaq və onları bir daha təkrarlamamaqdı. 7.    Heç kim, heç vaxt sizə pul verməyəcək! Heç kim sizə sıfırdan sərmayə qoymayacaq. İşinizə başlamaq üçün böyük kapitala ehtiyacınız varsa, əsas, yəni ən vacib işlərdən başlayın. Planınızı mümkün qədər sadələşdirərək dəyərini və onunla əlaqəli xərcləri araşdırın. İnvestisiya axtarmadan əvvəl biznesinizin dəyərini göstərməlisiniz. Konsepsiyanız uğurlu olarsa, investor tərəfindən kapital artırma şansınız əhəmiyyətli dərəcədə artacaqdı. 8.    Sağlam ol! Sağlam olmaq, daha məhsuldar olmaq deməkdi. Odur ki, özümüzü unutmamalıyıq. Sahibkarlıq bir həyat tərzidir, səhərdən axşama qədər çalışacağınız bir peşə deyil. Özünü tükətməklə  işləmək, qarşıya qoyduğunuz məqsədlərə çatmamaq deməkdi və bu Sizi daha çox narahat edəcək.  İstisnasız - düzgün qidalanın, idman edin və özünüzə vaxt ayırın. 9.    Sözlərinizin qurbanı olmayın! Əhvlatlarla deyil, əməllərlə təəssürat yaradın. Boş sözlərdən və həqiqəti şişirtməkdən çəkinin. İddialı planlarınızı reklam etdikcə, onların tələblərini ödəmək öhdəliyinizin olduğunu düşünün.  Bir sözlə, az danışıb çox iş görün! 10.    Vaxtı gələndə ayrılın! Ağıllı kapitan gəmi ilə batmaz. Nəfsinizə uymayın, geri çəkilməyin vaxtı gəldiyindən agah olun. Əməyiniz nəticə vermədisə, nəyin səhv olduğunu müəyyənləşdirin, nəticə çıxarın və atacağınız növbəti addımı düşünün. Həm özünüzə, həm də gələcək işlərinizə fayda gətirmək üçün bu çətin yolda qazanılmış dərslərinizdən nəticə çıxarın və ondan necə yararlana biləcəyinizi müəyyənləşdirin. Uğursuzluqlar qaçılmazdır, lakin güclü iradə hər cür çətinliyi dəf edəcəkdi.
10.01.2021
1001

Biznes ilə bağlı 16 maraqlı fakt

1. 1924-cü ildə "Ford T" avtomobilin qiyməti 265 dollar idi. 2. 1984-cü ildə mobil telefonun qiyməti 4195 dollar idi. 3. Dünyada satılan bütün ketçupların yarısından çoxu – “Heinz” markasının ketçuplarıdır. 4. Kubik-Rubik - bütün zamanlar ən çox satılan əşyasıdır. İkinci yerdə isə iPhone gəlir. 5. İlk ilində Coca-Cola yalnız 25 şüşə satış edə bilmişdi, amma davam etdi. 6. 1-ci sinfə yeni başlayan uşaq, müxtəlif şirkətlərin 200-ə yaxın loqosunu tanıya bilir. 7. Dünyanın bütün qəzetləri demək olar ki əksəriyyəti ABŞ və Kanadada nəşr olunur. 8. "face", "book", "wall", "poke" və "like" sözləri Facebook-un qeydiyyatdan keçmiş ticarət nişanlarıdır. 9. Çay əsasən 5 ölkədə yetişdirilir- Çin (demək olar ki,% 80 yaşıl çay), Hindistan (əsasən qara), Şri Lanka (Seylon, Lipton çayının doğulduğu yer), Yaponiya (ekzotik çaylar) və Tayvanda (müxtəlif yaşıl çay növləri) 10. İş həftəsinin ən məhsuldar günü çərşənbə axşamıdır. 11. Bütün restoranların 90% -i fəaliyyət göstərdiyi ilk bir il ərzində zərərlə işləyirlər. 12. Qəhvə beynəlxalq ticarətdə ikinci böyük əmtəədir. Birincisi benzindir. 13. IKEA-da malların adları xüsusi bir proqram tərəfindən hazırlanır və heç bir semantik məna daşımır. 14. Bütün dünyada Mc'Donalds üçün əsas gəlir mənbəyi içkilərdir. 15. Bir milyon dollar 100 dollarlıq əskinaslarda təxminən 10 kq ağırlığındadır. 16. Çin atalar sözündə deyilir: "Gülməyi bacarmayan insan ticarətlə məşğul olmamalıdır."
03.12.2018
5636

“IDEA Consulting & Solutions” : “Sizin üçün də bir hədiyyəmiz var”

Yeni ili Qubada qarşılayın! “Bakutel 2018” sərgisi çərcivəsində “IDEA Consulting & Solutions” şirkətinin elan etdiyi müsabiqə Sizə yadda qalan yeni il hədiyyəsi bəxş edəcək.   “Sizin üçün də bir İDEYAmız var” şüarı ilə hüquqi, maliyyə, mühasibat, biznes və İnformasiya Texnologiyaları sahəsində müxtəlif xidmətlər təqdim edən “IDEA Consulting & Solutions” şirkəti Bakı Ekspo mərkəzdə keçiriləcək “Bakutel 2018” sərgisinin iştirakçılarını öz stendinə dəvət edir. Stend “Baku Ekspo Mərkəzi”nin 2-ci zalında yerləşir. Şirkətin əməkdaşları sərgi çərçivəsində ziyarətcilərə, öz xidmətləri və yenilikləri ilə bağlı ətraflı məlumat verəcəklər. Sərgidən əvvəl şirkətin xidmətləri ilə “IDEA Consulting & Solutions” şirkətinin saytında tanış ola bilərsiniz. Şirkət xidmətlərini sərgi iştirakçılarına təqdim etməklə yanaşı, onlara “IDEA”dan xoş bir xatirə, yeni il hədiyyəsi qazanmaq imkanı yaradır. Müsabiqənin sponsoru “Terra Travel” turizm şirkəti qalibə Quba Şahdağ otelində 2 gecə/3 gün, 2 nəfərlik qonaqlama hədiyyə edəcəkdir.   Müsabiqənin şərtləri: Müsabiqə iştirakçısı “IDEA Consulting & Solutions” şirkətinin stendində təqdim ediləcək müsabiqə səhifəsində öz emailindən istifadə edərək 07.12.2018-ci il saat 12:00-dək qeydiyyatdan keçməli; Müsabiqə iştirakçısı qeydiyyatdan keçdikdən sonra öz emailinə göndərilən təsdiq linki ilə iştirakını təsdiqləməli və nəticədə qeydiyyat nömrəsi əldə etməli; Müsabiqə iştirakçısı qeydiyyatdan keçərkən öz Facebook istifadəçi ünvanını (nümunə: facebook.com/nickname) müvafiq xanada qeyd etməli, “IDEA Consulting & Solutions” və “Terra Travel” şirkətlərinin Facebook səhifələrini bəyənməli; Müsabiqənin şəffaflığını təmin etmək üçün dünyaca məhşur random.org saytından istifadə edilərək iştirakçılara verilən qeydiyyat nömrəsi əsasında təsadüfi seçim ilə qalib müəyyən ediləcək; Təsadüfi seçilən qeydiyyat nömrəsinə uyğun iştirakçı emailini təsdiqləməyən, “IDEA Consulting & Solutions” və “Terra Travel” şirkətlərinin Facebook səhifələrini bəyənməyən iştirakçı olarsa bu zaman qalib növbəti təsadüfi seçiləcək qeydiyyat nömrəsi əsasında müsabiqə şərtlərinə uyğun olaraq müəyyən ediləcək; Müsabiqə qalibinə hədiyyə təqdim edilərkən çəkilən şəkillər “IDEA Consulting & Solutions” və “Terra Travel” şirkətlərinin saytında və sosial media səhifələrində paylaşılacaq.   Müsabiqə qalibinin müəyyən edilməsi “Bakutel 2018” sərgisinin sonuncu günü (07.12.2018) həyata keçiriləcək. Bu barədə “IDEA Consulting & Solutions” və “Terra Travel” şirkətlərinin Facebook səhifələrində öncədən məlumat paylaşılacaq. Müsabiqə qalibinin seçim prosesi “Terra Travel” turizm şirkətinin Facebook səhifəsində (fb.com/terratravelazerbaijan) canlı olaraq yayımlanacaq.
16.11.2017
1178

MÜƏSSİSƏNİZİ DOĞRU TEXNOLOGİYA BAZASINDA QURMAQ ÜÇÜN ÖZÜNÜZƏ VERMƏLİ OLDUĞUNUZ 4 SUAL

Hər bir bina kimi, biznesinizi də möhkəm əsaslarla qurmaq lazımdır. Düzgün bünövrə olmadan divararı hörüb tavanı inşa etsəniz, bir müddət sonra binanın dağılacaqları qaçınılmazdır. İşinizi qurarkən istifadə olunan texnologiya həm güclü, həm də çevik olmalıdır. Müəssisəniz böyüyüb inkişaf etdikcə müxtəlif vəziyyətlərə hazır olmalı və çətin rəqabət dünyasında ayaqda qalmaq üçün ehtiyaclarınıza cavab verməlidir. Müəssisənizi doğru texnologiya bazasında qurmaq üçün özünüzə aşağıdakı 4 sual verməlisiniz: 1. Mobil cihazlara uyğunluq Sizin müəssisənizin ilk gündən etibarən istifadə etməyə başladığı texnologiya işçilərinizin hər an və hər yerdən istifadəsinə açıqdırmı? İşçiləriniz arasında real zamanlı məlumat mübadiləsi varmı? Bulud əsaslı mobil texnologiya istifadə edən müəssisələrin məhsuldarlığı daha yüksəkdir. Yolda və ya ofisdə, mobil tətbiqlərinizlə işlərinizi rahat və tez bir zamanda həll edə bilər, işçilərinizin də eyni şeyi edə biləcəyini bilərsiniz. Bir bulud əsaslı həll istifadə edirsinizsə, avadanlıq və proqram təminatı məsələləri ilə məşğul olmaz və tətbiqinizə hər hansı bir yerdən, istədiyiniz zaman daxil ola bilərsiniz. Biznes ehtiyaclarınıza cavab vermək üçün konfiqurasiya, test, yenilənmə və s. vaxt sərf etməzsiniz. Biznes proseslərinizi və əməliyyatlarınızı çevik, çox yönlü, istifadəçi dostu platforma həlli ilə idarə edə bilərsiniz. 2. Texnoloji infrastrukturun genişlənəbilən olması Biznesinizi qurarkən gələcək barədə düşünmək və genişləndiriləbilən texnologiya infrastrukturunu seçmək lazımdır. Vaxt keçdikcə müəssisənizin daha çox müştərisi, işçilərsi və əməliyyatları olacağını hesablamalısınız. Biznesiniz həcmcə böyüdükcə, texnoloji sistemlərinin dəyişdirilməsinə deyil, ilk gündən etibarən dəyişən ehtiyaclarınıza cavab verəcək müəssisə proqram təminatı infrastrukturuna investisiya qoymalısınız. İş proseslərinizi izləməyə, yeni istifadəçilər əlavə etməyə və digər müəssisə proqramlarınızla inteqrasiya edilməyə imkan verən bir texnologiya iş məhsuldarlığınızı artıracaqdır. 3. Etibarlılıq  Müştərilər, satışlar və müqavilələr kimi biznes məlumatınızı excel və ya word fayllarında saxlamaq nə qədər təhlükəsizdir? Sizin biznesiniz haqqında məlumatlar kopyalana və paylaşıla bilər. Müəssisənizin sağlam fundament üzərində qurulması üçün etibarlı bir infrastruktur seçməlisiniz. Müəssisə məlumatları və müştərilərizin barədə məlumatlarınız təhlükəsiz bir sistemdə saxlanılmalıdır. 4. İntellektual idarəetmə Sizin müəssisənizin müvəffəqiyyəti çox işləməklə deyil, ağıllı işləməklə əldə olunandır. Məlumat mərkəzli, sürətlə dəyişən bir iş dünyasında yenilikçi və rəqabətə davamlı olabilmək üçün istifadə edəcəyiniz texnologiya  manual olaraq idarə edilən işləri avtomatik olaraq həll edə bilməli, beləliklə siz əsl vacib olan işlərə, yəni müştərilərə vaxt ayıra bilməlisiniz. İntellektual idarə olunan sistemlər ilə məlumatlarınız arasından istifadəyə yararlı məlumatları əldə edə, müştərilərinizə daha yaxşı xidmət göstərə və gözlənilməz vəziyyətlərə hazır ola bilərsiniz.
16.11.2017
1277

UĞURLU BİZNESDƏ 9 QAYDA

1.    Mütəşəkkil olun Biznesdə uğur qazanmaq üçün yaxşı təşkilatlanmalısınız. Təşkilatlanma tapşırıqların yerinə yetirilməsində və işin öhdəsindən gəlməkdə bizə kömək olacaq. Bunun ən yaxşı üsulu bir siyahı yaratmaqdır – hər tapşırığı etdikcə, siyahınızı yoxlayın. Bu sizin heç nəyi unutmamağınıza kömək edəcək və siz, sizə biznes sahəsində lazım olacaq bütün tapşırıqları bitirəcəksiniz. 2.    Detallı qeyd tutun Bütün uğurlu bizneslərin arxasında detallı qeyd tutmaq durur. Bu qeydləri tutmaqla, siz biznesinizin maddi vəziyyətini və nə kimi çətinliklərlə qarşılaşa biləcəyinizi göz önündə tutmağa nail olacaqsınız. Sadəcə bunu bilməklə, siz maneələrin öhdəsindən gələ bilmək üçün vaxt qazanacaqsınız ki, bu da sizin uğur qazanmağınıza və öz biznesinizdə yüksəlməyinizə kömək edəcəkdir. 3.    Rəqiblərinizi təhlil edin Rəqabət yaxşı nəticə əldə etmək üçün ən əla vasitədir. Uğur əldə etmək üçün, siz öz rəqiblərinizdən öyrənməkdən qorxmamalısınız. Bütün bunların sayəsində, onlar yaxşı bir şey edə bilərlər ki, siz də daha yaxşısını etməklə öz biznesini inkişaf etdirə və yaxşı gəlir əldə edə bilərsiniz. 4.    Riskləri və mükafatları dərk edin Uğurlu biznes qurmaqda əsas amil risklərinizi hesablamaqdır. Özünüzdən soruşun “işin zərərli tərəfi nədir?”( “What’s the downside?”). Əgər siz bu suala cavab verə bilirsinizsə, deməli, siz ən pis halı da bilirsiniz. Bu məlumat sizə riskləri hesablamağa və biznesinizdə böyük uğur qazanmağınıza imkan verəcək. 5.    Yaradıcı olun Hər zaman yenilikçi olun və biznesinizi inkişaf etdirmək üçün yollar axtarın. Bu sizi rəqiblərinizdən üstün edəcək. Nəzərə alın ki, siz hər şeyi bilə bilməzsiniz, yeni ideyalara və yeni yanaşmalara açıq olun. 6.    Diqqət mərkəzində olun Belə bir qədim ifadə “Roma bir günə Roma olmayıb” bizim üçün keçərli ola bilər. Sadəcə ona görə ki, biznes sizin dərhal pul qazanmağa başlayacağınız anlamına gəlmir. Bu vaxt tələb edir ki, insanlar sizin kim olduğunuzu bilsin. Beləliklə, öz məqsədlərinizə çatmaqda istəkli olun və hər şeyin öz yoluna düşməsi üçün özünüzə zaman tanıyın. 7.    Qurban verməyə hazır olun (itirməkdən çəkinməyin) Biznesə başlamaq üçün ilk addım gərgin işdir, lakin qapılarınızı açandan sonra, sizin işiniz sadəcə başlanğıcdır. Öz növbəsində, uğur qazanmaq üçün ailəniz və dostlarınızla az vaxt keçirməyə hazır olmalısınız. 8.    Keyfiyyətli xidmət göstər Biznesmenlər bəzən unudurlar ki, müştəriyə keyfiyyətli xidmət göstərmək çox önəmlidir. Əgər siz müştərilərinizi keyfiyyətli xidmətlə təmin edirsinizsə, onlar növbəti dəfə ehtiyacları olanı əldə etmək üçün rəqibinizə yox, məhz sizə müraciət edəcəklər. 9.    Davamlı (ardıcıl) olun Davamlılıq biznesdə gəlir əldə etməyin ən əsas komponentlərindəndir. Uğurlu biznes üçün siz gündəmdə olan və olmayan şeyləri bilməli, davamlı olaraq iş görməlisiniz. Bu sizin uzun müddət gəlir əldə etməyinizə şərait yaradacaqdır.